Дапабачэння, школа (+ фоткі) Здаецца, што і зараз усё
адбывалася, як заўсёды, як у той час, калі яшчэ бацькі сканчалі сярэднюю школу.
Урачыстая лінейка, выступы ўдзельнікаў і запрошаных гасцей, цырымонія
развітання з выпускнымі класамі, блуканні па горадзе, вечаровыя мерапрыемствы. Але
ў гэтым годзе ёсць і змяненні. Пэўны час у Нясвіжы па ініцыятыве аддзела
адукацыі праводзіліся "маршы выпускнікоў” з вечаровымі "тусоўкамі” у раённым
Доме культуры. Мерапрыемства цікавае і карыснае. Яно падабалася выпускнікам
хоць і вымагала сродкаў ды арганізацыйных высілкаў з боку кіраўніцтва адукацыяй
раёна. Звычайна адбывалася шэсце выпускнікоў па горадзе з ускладаннем кветак да
магілы загінуўшым у Айчыннай вайне салдатам. Затым цырымонія працягвалася ў
актавай залі раённага Дома культуры, дзе каманды выпускнікоў мелі магчымасць у
тэатралізаванай форме развітацца са школай і заявіць аб сабе.
Адбывалася ўзнагароджанне лепшых,
выказваліся падзякі настаўнікам і выхавацелям.
На гэты раз раённае кіраўніцтва адукацыі
"схавалася ў кусты”, а правядзенне мерапрыемстваў усклала на плечы кіраўніцтва
школ. Відаць так прасцей ды і адказнасці меней, а можа проста не хапіла грошай
у дзіравым бюджэце раёна?
Але школы і самі здолелі арганізаваць святы
для сваіх выпускнікоў. Далей – пачынаюцца экзаміны і былыя школьнікі ўступяць ў
самастойнае жыццё. Цяжка казаць, што іх чакае ў гэтым жыцці, бо вядома, як
падарвана сістэма сярэдняй адукацыі выбрыкамі і эксперыментамі адукацыйнага
чынавенства. Аб’ём ведаў, якія даюць школьныя праграмы, значна ніжэйшы за
патрабаванні на іспытах (тэставанні) пры паступленні ў вышэйшыя навучальныя
ўстановы. Каб падрыхтавацца трэба мець грошы і займацца ў прыватнага
рэпітытара, а іначай нічога не атрымаецца. Школа ўвогуле за апошнія гады
ператварылася ва ўстанову, дзе дзяцей шчыльна перагружаюць імітацыяй клопату аб
іх.
Канцэрты, спаборніцтвы, алімпіяды,
канферэнцыі, кіналекторыі і бясконцы шэраг іншых абавязковых "карысных”
мерапрыемстваў, якія адымаюць у школьнікаў і настаўнікаў час і адсоўваюць
аснову адукацыі – ўрок, на другі план.
Да таго ж школа, як і раней, выхоўвае не асобу, а "паслухмяныя
вінцікі”, на якіх у будучым павінна трымацца дзяржаўная сыстэма. Асабліва цяжка
гэтым "вінцікам” уступаць ў самастойнае жыццё, дзе трэба прымаць рашэнні, несці
адказнасць і самастойна, без камандаў будаваць сваю будучыню. Ні школа, ні
БРСМаўскія арганізацыі гэтаму не вучаць. Значыць прыйдзецца пачынаць з нуля.
А.Язьвінскі На фотаздымках выпускнікі Нясвіжскай сярэдняй школы №3
|