Нясьвіж наведала дэлегацыя з галандыі + фоткі

У спартовым комплексе ў Рудаўцы адбыўся сяброўскі матч юнакоў з Галандыі і Нясьвіжа па баскетболу. Спаборніцтвы выклікалі цікаўнасьць нясьвіскіх аматараў гэтага віду спорта.

І хоць вынікам сталася пераканаўчая перамога нясьвіжан, тым ня меньш абстаноўка была па-сапраўднаму сяброўская. Гульцы прадэманстравалі някепскую гульню, ў якой нашыя хлопцы выявілі больш значную фізічную падрыхтоўку, што і дазволіла атрымаць перавагу над супернікам.

Але трэба адзначыць, што нягледзячы на гэтыя абставіны, галандскія юныя баскетбалісты знайшлі што прадэманстраваць нясьвіскім хлопцам. Яны гулялі вельмі зладжана адзінай дружнай камандай і хоць ўступалі крыху ў хуткасьці, але час ад часу знаходзілі магчымасьць прарыву ў абароне каманды гаспадароў.

Усё закончылася конкурснымі выступамі з мэтаю вызначэньня лепшых майстроў выкананьня кідкоў з розных адлегласьцяў і рознымі тэхнічнымі прыёмамі. Затым адбылося сяброўскае фатаграфаваньне, абмен сувенірамі.

У пачатку сустрэчы кожная каманда атрымала сьвяточны каравай, выпечаны, трэба думаць, у Нясьвіскім кандытарскім цэху. Вельмі прыгожы зьнешне і зусім не такі на смак. У нашых пекараў, як заўсёды, чаго-небудзь не хапае. Не знайшлося разынак, альбо ваніліну. Сахару у Нясьвіжы бракуе таксама.

Здавалася б дробязь, якая не заслугоўвае ўвагі, але з гэтых дробязяў складаецца ўражаньне аб нашай краіне і нашым горадзе. Я асабіста пакаштаваў таго пірага і ня думаю, што галандскія хлапчукі яго зьядуць. Ва ўсялякім разе нясьвіжане пакінулі сваю, крыху абшчыпаную булку ў спартовай разьдзявалцы.

Алесь Язьвінскі