Развітанне з летам
Хутка, неяк нават незаўважна, у жвіры падзей, клопатаў, а калі і ў прыемным баўленні часу, праляцелі летнія канікулы ў нашага падрастаючага пакалення. Зноў надыйшло трывожна-прыемнае і неяк святочна-засярэджанае 1-е верасня. Час настройвацца на плённую працу са школьнымі падручнікамі. Але гэта зусім ня значыць, што ў дзяцей не застаецца часу на актыўны адпачынак і добрыя справы.
З 5-га па 7-е верасня на радзіме Якуба Коласа, паблізу вёскі Мікалаеўшчына, Стаўбцоўскага раёну, школьнікі нясвіжскіх школ прымалі ўдзел ў турыстычным летніку пад назовам: “Нашчадкі Коласа, Скарыны”. Мерапрыемства ладзілася Нясвіжскім турыстычным клубам “Вандроўнік” сумесна з грамадскай арганізацыяй Таварыства беларускай мовы імя Ф.Скарыны пад дэвізам: ”Зробім лепш” і было прымеркавана да пачатку новага навучальнага году.
Юныя нашчадкі Коласа і Скарыны спаборнічалі ў тэхніцы турызма і выпрабоўвалі свае сілы ў розных конкурсах і турнгірах. Моладзі было прапанована адчуць сябе сапраўднымі беларусамі і размаўляць увесь час паміж сабой на роднай мове. Да таго ж кожны меў магчымасць выпрабаваць сябе ў сіле, альбо спрытнасці. Удзельнікі кідалі дзіду ў цэль, камяні на далечыню, гулялі ў валейбол і бадмінтон, спаборнічалі на воднай стужцы перашкод.
Камандныя вынікі ў спаборніцтвах не падводзіліся, але кожны меў магчымасць прадэманстраваць свае здольнасці і атрымаць каштоўны падарунак ад арганізатараў мерапрыемства.
У суботні вечар сябры турклуба “Вандроўнік” падрыхтавалі для удзельнікаў злёту на беразе ракі Нёман турыстычную лазню. Усе з задавальненнем прымалі працэдуру з дубовымі венікамі і акунаннем у прахладнай рачной вадзе.
Крыху пазней вясёлы народ сабраўся каля агульнага вогнішча, дзе слухалі песні пад гітару ў выкананні беларускага гурта “Рахіс”, два сябры якога прыехалі менавіта сюды, каб пад ціхія усплёскі нёманскай плыні, у зачараванным святле месячнай поўні праспяваць свае мілагучныя песні.
Зарад бадзёрасці і ўражанняў дапаможа маладым ўдзельнікам злёту з новымі сіламі прыступіць да навучання ў школе, а атрыманы досвед у турыстычнай справе дапаможа школьнікам актыўна ўключыцца ў турыстычнае жыццё нясвіжчыны. Да таго ж. моладзь заўсёды чакаюць і ў турклубе “Вандроўнік”. Наперадзе яшчэ шмат спраў.
Алена Цымбарэвіч,
старшыня Нясвіжскага турклуба “Вандроўнік”
Спявае гурт "Rahis"
Узнагароджванне пераможцаў
Спаборнічаюць "воднікі"
Падрыхтоўка турыстычнай лазні
Турыстычная лазня
|