 Пад санкцыі Еўрасаюза ўпершыню патрапіла дырэктар школы
«Чорны спіс» беларускіх чыноўнікаў, якім забаронены ўезд у краіны Еўрапейскага саюза, папоўніўся яшчэ 13 прозвішчамі. У спіс людзей, якіх Еўропа лічыць злачынцамі, патрапіла Наталля Меркуль — дырэктарка Талькаўскай сярэдняй школы (за звальненне паводле палітычных матываў настаўніцы гісторыі вышэйшай катэгорыі Наталлі Ільініч). Гэта сёмы выпадак уключэння ў спісы неўязных імя кіраўніка навучальнай установы.
У спіс таксама патрапіла суддзя Пухавіцкага раёна Святлана Акуліч, якая адхіліла пазоў Наталлі Ільініч аб аднаўленні на працы.
Наталля Ільініч адпрацавала ў Талькаўскай школе 26 гадоў і лічыць, што яе звальненне звязанае з актыўнай грамадзянскай пазіцыяй. Са звальненнем яна не змірылася, падала ў суд, аднак аднавіцца на сваім месцы працы ў яе пакуль не атрымалася.
Раней Еўрасаюз забараніў уезд на сваю тэрыторыю яшчэ 6 рэктарам і кіраўнікам беларускіх навучальных установаў, у тым ліку рэктарам БДУ, БДУІРу, БДПУ і БрДУ.
«Неўязныя» кіраўнікі беларускіх навучальных установаў:
- Наталля Меркуль — дырэктарка Талькаўскай сярэдняй школы;
- Генадзь Падгайскі — дырэктар Мінскага дзяржаўнага палітэхнічнага каледжа; *
- Пётр Кухарчык — рэктар Беларускага дзяржаўнага педагагічнага ўніверсітэта;
- Міхаіл Батура — рэктар Беларускага дзяржаўнага ўніверсітэта інфарматыкі і радыёэлектронікі;
- Мечыслаў Часноўскі — рэктар Брэсцкага дзяржаўнага ўніверсітэта;
- Тамара Алпеева — рэктар Міжнароднага гуманітарна-эканамічнага інстытута;
- Сяргей Абламейка — рэктар Беларускага дзяржаўнага ўніверсітэта.
Паводле http://generation.by
PS. Многім падасца, што ў "шасьцёрак" рэжыму няма выбару, што яны таксама нечым рызыкуюць, ня маюць сывабоды для прыняцьця рашэньня, вымушаныя ісьці на рэпрэсіі. Але гэта ня так, кожны чалавек заўсёды мае выбар: застацца чалавекам, захаваць чалавечую годнасьць, ці ператварыцца ў халуйскую чалавекападобную істоту. Выбар ёсьць заўсёды. Іншая справа, што заўсёды карысьна дагаджаць начальству, тады робіцца спакойней існаваць. Іншы ж выбар вымагае сумленьня і ахвяраваньня.
Дырэктарка салігорскай школы зрабіла іншы выбар, калі супрацоўнікі КДБ вымагалі ад яе (якая мярзотнасьць) шальмаваць школьніка зь ейнай школы - Івана Шылу. Яна звольнілася з працы, але на мярзотнасьць не пагадзілася. Праўда для гэткага рашэньня ў чалавека павінна быць якасьць, якая яго робіць чалавекам - гэта сумленьне.
Надыдзе час, калі нашых дзяцей будуць выхоўваць сумленныя настаўнікі, калі меркулям ня будзе месца ў выхаваўчых дзіцячых установах. Чаму можа навучыць паслухмяны бяспрынцыпны выхавацель у якога адсутнічае сумленнасьць? Думаецца, што гэты час ужо набліжаецца.
(рэд. Брамы)
|
