Да Бога? Раскашэльвайся!
Напрацягу апошняга месяца ў
сродках інфармацыі зьяўляліся паведамленьні, што ўваход ў Нясьвіскі фарны
касьцёл зрабіўся платным. Як і што – дакладна ніхто сказаць ня мог. Па адных
чутках людзі казалі, што гэта ініцыятыва касьцёлу, па іншых – райвыканкаму.
Тым ня меньш, на ўваходзе стаяў чалавек, які зьбіраў грошы.
Вернікі распавядалі, што палова збораў пойдзе на патрэбы утрыманьня ў належным
стане будынка храму, і таму ксёндз пайшоў на гэтую ахвяру, упусьціўшы ў касьцёл
зборшчыка грошай. Дарэчы, займаецца гэтым прыватная Нясьвіская турыстычная
фірма, якая арганізуе паборы і ў іншых месцах, як, напрыклад, ля ўваходу ў Нясьвіскі парк.
Не абыйшлося і бяз канфліктаў.
Прыехаўшы з Гародні ксёндз з паломнікамі ня змог наведаць Нясьвіскі касьцёл, бо
іх проста не прапусьцілі зборшчыкі халяўскіх грошай. Здаралася, што ледзь не
даходзіла да бойкі з прыхажанамі, якіх "тармазілі” бізнэсоўцы-бязбожнікі. Гэта
ж трэба было дадумацца да такога – прапускаць да Бога за грошы! Хто ж
разбярэцца ў тым, зь якой мэтай чалавек заходзіць ў храм – памаліцца, ці як
турыст? Ды чаму ж ня можа маліцца прыезжы паломнікк, альбо чалавек з
турыстычнай групы?
Увогуле, гэта дзікунства – браць
грошы за ўваход у храм гасподні. Калі якая турфірма і можа ўзяць плату з сваіх
кліентаў за наведваньне касьцёлу, дык рабіць гэта трэба не ў храме, а пасьля
абавязкова, па дамоўленнасьці, неабходна пералічваць грошы касьцёлу. А ваяваць за прыбыткі на прыступках
будынка хрысьціянскага храму, куды дарога павінна быць адчынена заўсёды і для
ўсіх, нават для жабракоў – справа
бязбожнікаў і дзікуноў.
Але, што рабіць, калі вельмі
хочацца здабыць манету хоць бы з паветра? Тады прыходзіцца ісьці на ахвяру.
Ахвяруецца пры гэтым рэпутацыя храма і тых хто там служыць, але "турыстам-прадпрымальнікам”
і іхным апекунам, відаць, начхаць на гэта.
Дзіўным аказалася і тое, што
грошы зьбіраліся проста "ад балды”, бо ніхто ніякіх папер не падпісваў, ніякіх
дагавароў і "соглашеній” з касьсёлам не заключаў і ў Менску з кардыналам не
ўзгадняў. Грошы зьбіраліся напрацягу месяца, а на рахунак касьцёлу паступіў
"кукіш з маслам”.
Як распавядаюць сябры
касьцельнага камітэту, ніякіх папер не падпісана і сёньня (напрыканцы
лістапада), хоць да гэтага іх прымушалі таварышчы з райвыканкаму не аднойчы.
Прадстаўнікі ж турыстычнай канторы нахабна працягваюць збор грошай, ігнаруючы
патрабаваньні прыхажан і служкаў касьцёлу прыпыніць фінансавыя авантуры ў Божым
храме.
У дачыненьні да грошай у касьцёле
павінен быць толькі адзін падыход – дабраахвотныя ахвяраваньні па-сумленьні.
Іначай справай пачынае кіраваць нячыстая сіла. Грошы – гэта ейны інструмант
разбурэньня людзкіх душаў.
Але ці варта зьдзіўляцца такой
сытуацыі ў становішчы савецкага атэізму і паказушнай набажнасьці ўлады?
Алесь Язьвінскі. Нясьвіж, 30
лістапада 2009г.
|