Радзівілы зноў ў
Нясьвіжы Сёньня, 20 кастрычніка, у Нясьвіжы адкрылася навукова-практычная канфэрэнцыя “Нясьвіскі палац Радзівілаў: гісторыя, новыя дасьледаваньні, вопыт стварэньня палацавых музэйных экспазыцый”.
Гэтая канфэрэнцыя прысьвечана аднаўленьню нясьвіскага палаца Радзівілаў, які адкрыецца ў 2011 годзе пасьля рэстаўрацыі.
Князі Мацей і Мікалай Радзівілы, якія адмыслова прыехалі з Польшчы, урачыста перадалі на канфэрэнцыі некаторыя экспанаты для будучага музэю. Гэта шэсьць копій карцінаў (пераважна партрэтаў) і славутых радзівілаўскіх абразоў, а таксама дзьве арыгінальныя гравюры.
На адкрыцьці канфэрэнцыі выступіў міністар культуры Павал Латушка. Ён сказаў, што ў блізкім часе плянуецца перадача 48 копіяў розных карцінаў, зьвязаных з палацам Радзівілаў, ад Міністэрства культуры Польшчы. І яшчэ 40 копій паступяць з розных калекцыяў Радзівілаў.
Дарэчы, сёньня была перададзена яшчэ адна копія карціны са славутай радзівілаўскай калекцыі — ад Беларускага гістарычнага музэю.
Удзельнікі канфэрэнцыі агледзяць палац.
Мацей Радзівіл перадае экспанаты для будучага музэю
Мацей Радзівіл перадае экспанаты для будучага музэю міністру культуры Паўлу Латушку
|
