Манкуртызацыя

Верш паэта, радактара газэты "Нясвіжскі час" з Баранавічаў прысьвечаны тэме выраджэньня беларусксьці ў душах нашых суайчыньнікаў (рэд.)

Аляксей Белы

Бяз мовы няма культуры, 
Бяз культуры няма нацыі.

…Так і зьнікне народ, і згіне,
хоць працуюць тут адмыслова…
Мы – дыяспара ў роднай краіне,
Дзе цураюцца роднага слова.

Бяз прычыны – радасьць ці гора –
Разьмятаем гарэлку ў краме,
А на мове сваёй гаворым
З аднадумцамі ды сябрамі.

Тут ніхто ў цябе ня спытае,
Ці хапае на хлеб зарплаты.
У аўтобусе скажаш “Вітаю!” –
Усе глядзяць, быццам бы на вар’ята.

…Думкі круціць, бы човен на стрыжні.
Нешта ў іх ад паганскай замовы…
А скажыце, нашто ў Парыжы
Таварыства францускае мовы?