Асьцярожна – зноў аблавы!

Нясьвіжане, асьцерагайцеся гуляць па вуліцах гораду ўвечары, альбо ўначы. Гэта рэч даволі небясьпечная і не таму, што на вас могуць напасьці бандыты, альбо маньякі. З гэтым у нас, дзякаваць Богу, усё нармальна. Баяцца трэба, нажаль тых, хто якраз павінен ахоўваць наш пакой і бясьпеку – супрацоўнікаў правапарадку. Менавіта яны ў апошні час актывізавалі сваю дзейнасьць па адлове мірных і законапаслухмяных грамадзянаў у цёмны час сутак.

Не, у нас яшчэ не ўведзены каменданцкі час, але ў краіне ўзьніклі праблемы з напаўненьнем дзяржаўнай казны. Няма грошай у казьне. Пераабраньне галоўнакамандуючага ўжо аформлена і можна зноў прыступаць да вытрасаньня кішэняў працоўных беларусаў.

Тэрмінова прыпынены мараторый на шпацыраваньне па вуліцах гораду бяз апазнавацельных знакаў, зноў распачаты адлоў і штрафаваньне нефлікірызаваных асобаў. Вельмі прыемна адчуць на сабе чутлівыя клопаты аб нашай бясьпецы зь мянтоўскага боку. Дарма супрацоўнікі крыўдуюць за тое, што іх называюць мянцярамі, а як жа іначай, калі ты язаймаюцца сапраўдным паляваньнем на безабаронных грамадзян. Выйшаў на вуліцу, за вароты – раскашэльвайся на суму, якая дазваляе студэнту бязьбедна праіснаваць больш за тыдзень. Як вам такія клопаты і колькі здароўя каштуюць яны тым, каго мянты нібыта хочуць зьберагчы ад пападаньня пад колы аўтамабіля? Прыкіньце, які збор атрымліваецца – не горш чым на гандлі алькагольнымі напоямі!

Беражыцеся мянтоў на вуліцы, абяруць, як ліпку і не пашкадуюць – у іх плян па нарыхтоўцы сродкаў для лукашэнкаўскага дзяржаўнага загашніка.

Алесь