Сэнсацыйная падзея
(падслуханы дыялёг кабеты
Веры Востраносай з жыхаром Нясьвіжа Кузьмой Падкаблучным) – Слухай, Кузьма, кажуць, што у Нясьвіжы над
будынкам пракуратуры вывесілі незарэгістраваную сымволіку. Дык гэта, што ж
значыць? Мабыць Нясьвіская пракуратура падтрымала апазыцыю і ў знак
салідарнасьці з народам, ды супраць палітычных рэпрэсіяў, вывесіла
незарэгістраваную ў законным парадку сымволіку?
– Ды што ты кажаш, баба Вера, няўжо пракуратура
вывесіла бел-чырвона-белы сьцяг над сваім будынкам? Дык іх жа ш зараз мянты
арыштуюць і ўпаяюць па тры мільёны рублёў штрафу кожнаму супрацоўніку – за
выкарыстаньне незарэгістраванай сымволікі. Шкада пракуратуру, пацерпіць за
праўду і справядлівасьць.
– Ды не, Кузьма, здаецца не бел-чырвона-белы сьцяг,
а зялёненькі такі з чырвоненькім флажок, але ў выглядзе ашчэранай пашчы дракона
– баявы такі штандар. Яшчэ больш нямірны, больш ваяўнічы за нацыянальную Пагоню.
– І не баяцца ж нясьвіскія ахоўнікі законнасьці
так сьмела выступіць супраць рэпрэсіўных судовых працэсаў у Менску, што
распачаліся пасьля 19-га сьнежня. Хвала ім і гонар, мужным героям у сініх
мундзірах за ўсталяваньне законнасьці і парадку ў нашай краіне. Няхай ім Бог
дапаможа нарэшце пакончыць з бяззаконьнем і несправядлівасьцю.
– Можа нарэшце ўдасца пад пракурорскім наглядам
правесьці сапраўдныя выбары, без усялякай фальсіфікацыі ды падробак. Людзі
нарэшце змогуць па-сапраўднаму выявіць сваю волю на выбарчых участках, а ўсіх
дзеячоў з выбарчых камісіяў, злоўленых на злачынных дзеяньнях, прыцягнуць
нарэшце да крымінальнай адказнасьці.
– Дай ты Бог. Нават няверыцца, можа ты чаго
наблытала, старая?
– Ды не, усе так кажуць. Людзі ж хлусіць ня
стануць. падслухаў Фядот Востравухі,
спецкор Нясьвіскіх Навінак
|