На першым маршруце

Турысты-воднікі зь Нясьвіскага турклубу "Вандроўнік” адчынілі турыстычны сэзон вандроўкай на Палесьсе. 20 ўдзельнікаў на 8 лодках сплаўляліся па рэках Случ ды Прыпяць да старажытнага беларускага гораду Тураў. Падарожжа прышлося на цёплыя сонечныя дзянькі, так, што холадна ня было, але шмат каму давялося залечваць апёкі.

Рака Случ немнагаводная і працякае праз забалочаныя мясьціны. Бывае так, што некалькі гадзін немагчыма нават прычаліць да берагу, каб крыху адпачыць ды падсілкавацца. Берагоў проста няма, а ўздоўж русла па абодва бакі толькі балота.

Прыпяць жа, наадварот уражвае прасторам і вялікай вадой. Здаецца неабсяжным яе мнагаводнае русла з безьліччу затокаў і бясконцых лугоў. Уражвае прыроднае багацьце. Нідзе больш не пачуць такога мнагалікага птушынага хору, не пабачыць наўпрост зь берагу такой колькасьці рыбы, як у Прыпяці.

150 кіламэтраў на вясьле можа падацца непадрыхтаванаму падарожніку сапраўдным выпрабаваньнем, але не нясьвіскім турыстам. Вандроўка ўдалася. Шмат ўражаньняў і ўспамінаў.

Алесь