Aбсурд Фальсыфікатара пад суд
Сымптаматычнае "ліставаньне” адбываецца ў нашых людзей і арганізацыяў з існуючай цяпер уладай. Насуперак закону ўзурпатар чацьвёрты раз ідзе на выбары "выбірацца” на прэзыдэнта. Перад гэтым ён двойчы публічна паведамляе, што сфальсіфікаваў папярэднія выбары і даваў пра гэта ўказаньні. Але калі наша народная партыя (КХП – БНФ) зноў (у каторы раз) зьвярнулася ў Генпракуратуру аб факце прызнаньня злачынства Лукашэнкам і аб правядзеньні сьледзтва, дазнаньня і аб узбуджэньні справы, то атрымалі дзівосны па сваёй "дэмакратычнасьці” і праўным абгрунтаваньні адказ.
Аказваецца, як паведамляе Генпракуратура, "згодна арт. 33 Канстытуцыі Рэспублікі Беларусь кожнаму гарантуецца свабода поглядаў, перакананьняў і іх свабоднае выказваньне”. Вось Лукашэнка свабодна і выказаўся, што выбары сфальсіфікаваў. Мае права выказвацца. Дакумантаў пра фальсіфікацыю Генпракуратура ня мае. А таму падставы для праверкі і ўзбуджэньня справы няма.
Вось гэта палёт! Фармулёвачка! Абгаварыў, значыцца, сябе грамадзянін Лукашэнка. Зрэшты прапануем сябрам Партыі і прыхільнікам самым азнаёміцца з гэтымі лістамі, сакрэту тут няма. Зянон Пазьняк
|