“Повестка”
бяз выходных дадзеных, альбо запрашэньне да
пракурора
Двойчы у паштовай скрыні я знаходзіў канвэрты, ў
якіх была ўкладзена паперка з загалоўкам “ПОВЕСТКА”. Далей месьціўся напалову
друкаваны, а напалову рукапісны тэкст з маім запрашэньнем наведаць пракуратуру
ў якасьці сьведкі. Ні подпісу, ні пячаткі - як гэтага патрабуе заканадаўства. Вось і думай, ці сапраўды
запрашаюць ў пракуратуру, ці нехта проста цешыцца, як калісьці гэта рабілі
супрацоўнікі Нясьвіскага аддзелу ўнутранных спраў, бяспадстаўна турбуючы мяне па
некалькі разоў на дзень. Яны таксама выпісвалі паперкі, аднойчы нават у міліцэйскім "уазіку" на маіх вачах. Супрацоўнікі бясцырымонна ўмешваліся
ў маё прыватнае жыцьцё: званілі па тэлефоне спраўляючыся аб маіх намерах куды
ісьці ці ехаць, прыязджалі да хаты (начальнік пасылаў даведацца ці дома я),
сачылі за маім кожным крокам, нібыта за злачынцам, хоць не ў якіх парушэньнях
закону мяне ніхто не абвінавачваў і да адміністрацыйнай, альбо якой іншай
адказнасьці я не прыцягваўся.
Давялося зьвярнуцца ў пракуратуру, каб пазбавіцца
ад міліцэйскага шальмаваньня і беспадстаўнага ўмяшальніцтва ў прыватнае жыцьцё.
Але марна, пракурор Нясьвіскага раёну т.КаморнікА.І. адказаў, што міліцыя мае
права рабіць гэта...
А зараз вось я атрымліваю такую ж паперку (без
пячаткі і подпісу) ужо з самой пракуратуры. Трэцьцюю так званую “повестку” мне
ўручыў ужо на працы участковы супрацоўнік аддзелу. На маю заўвагу сам
распісаўся на гэтай паперцы (замест пракурора).
У пракуратуры т.Каморнік растлумачыў, што ў іх такія блянкі "повесток" надрукаваныя раней і таму пячатка ставіцца толькі пасьля наведваньня іхнай
ўстановы. А калі гэтая паперка - розыгрыш суседа, а я прагуляю працоўны час? Хто тады мне падпіша "ліпавы" лісток і ці не выжануць з працы за прагул?
Выклікалі ж мяне ў якасьці сьведкі, як выдаўца мясцовай
незарэгістраванай малатыражнай (да 300 паасобнікаў) газэты, каб зрабіць папярэджаньне,
што недапушчальна:
1.Падпісвацца у выходных дадзеных выпускаемай мною
газэце “Брама”, як рэдактар, паколькі рэдакцыяй павінна быць юрыдычнай асобай,
а гэта значыць – зарэгістраванай ў законным парадку газэтай.
2. Неабходна, у суадноснасьці з артыкулам №23
закону аб пячатных сродках масавай інфармацыі, рассылаць экзэмпляры газэты: “1. республиканскому
органу государственного управления в сфере массовой информации, 2. в учреждение «Национальная книжная палата Беларуси»,
3. государственные учреждения
«Национальная библиотека Беларуси», 4.
«Президентская библиотека Республики Беларусь», 5. «Центральная научная библиотека имени Якуба Коласа
Национальной академии наук Беларуси», ? другие
организации согласно перечню, определяемому Советом Министров Республики
Беларусь”.
На маё пытаньне – чаму пракурор сам асабіста
займаецца такімі дробнымі справамі, адказу не атрымаў, відаць не па сваёй волі
даводзіцца пракуратуры “разграбаць” заканадаўчыя нестыкоўкі, напрацаваныя яшчэ
папярэдняй “палаткай”, у якой “плённа” працавала вядомая ў Нясьвіжы М.Худая. Ды, відаць, для ўлады пытаньне незалежнай прэсы, якая можа абыходзіцца бяз сьвядомай хлусьні, зусім ня дробнае, таму і даручаецца пракурору асабіста займацца "наведзеніем законного порядка в печаті".
У заключэньні сустрэчы мне было прапанавана
падпісацца пад тым, што я азнаёмлены з заканадаўствам і ведаю аб адказнасьці.
На чым і разышліся.
Алесь Язьвінскі Нясьвіж,
26.10.2009г.
|