Рэакцыя на абразу са спазненнем
Супрацоўнікі Клецкага РАУС выклікалі праваабаронцу Сяргея Панамарова ў аддзел і паведамілі, што неабходна скласці пратакол, паколькі паступіла сустрэчная заява начальніка жыллёва-камунальнай гаспадаркі Аляксандра Навіцкага.У заяве Навіцкі просіць прыцягнуць да адміністрацыйнай адказнасці Панамарова за абразу ў адрас Навіцкага. Сведкамі абразы аказаліся трое яго рабочых.
Сяргей Панамароў не пагадзіўся падпісваць заяву, сказаў, што прыйдзе па позве і з адвакатам.
На думку праваабаронцы, – гэта знаёмы почырк, аналагічны справе Яны Паляковай:
- А зараз я буду падаваць заяву на ўзбуджэнне крымінальнай за паклёп на ілжэсведкаў і самога Навіцкага.
Нагадаю, што 15 сакавіка ў Клецк прыехала група Антона Астаповіча з трох чалавек, каб зрабіць здымкі гістарычных помнікаў. У гэты лік уваходзіць і будынак пачатку 20 стагоддзя, дзе ў дадзены момант размяшчаецца мясцовая ЖКГ.
Групу суправаджаў прафесійны мастак Сяргей Панамароў. Па словах Панамарова, не паспелі яны зрабіць некалькі здымкаў, як з будынка з крыкам выскачыў кіраўнік Навіцкі, які абразіў Панамарова, вырваў пасведчанне, якое паказаў адзін з групы Зміцер Савельеў пасля патрабавання Навіцкага. І толькі выпадкова ўдалося выхапіць пасведчанне з рук невядома ад чаго раз’юшанага кіраўніка ЖКГ.
На фотаздымку начальнік Клецкай ЖКГ Навіцкі
Ганна Васілевіч, Радыё Рацыя.
|