Наталлю Iльініч просяць забраць заяву з пракуратуры
"Народная Воля” па просьбе чытачоў вырашыла пацікавіцца лёсам настаўніцы з Талькі Наталлі Ільініч, якая першая публічна расказала пра тое, як начальніца Упраўлення адукацыі Мінскай вобласці Таіса Данілевіч прапаноўвала ёй і яе калегам выбіраць: альбо сяброўства ў апазіцыйнай партыі, альбо праца. Наталля і настаўнік з Нясвіжа Алесь Язвінскі пасля той скандальнай гутаркі звярнуліся з заявай у пракуратуру Мінскай вобласці.
— У аўторак вечарам да мяне прыходзіла маці адной вучаніцы і прасіла, каб я забрала заяву з пракуратуры, — расказала Наталля. — Быццам бы дырэктара нашай школы зноў выклікала да сябе Данілевіч і прасіла паўплываць на мяне, з тым каб я забрала заяву з пракуратуры. Сама дырэктар мне нічога не казала, а вось бацькі... Прычым, як я зразумела з гэтай гутаркі, бацькам сказалі, што з-за мяне могуць закрыць школу і нашых дзяцей перакінуць у Блужскую. Я тлумачу, што адна няўгодная ўладам настаўніца не можа быць прычынай закрыцця цэлай школы. Іншая справа, што абласное ўпраўленне адукацыі хоча зрабіць у Блужскім аграгарадку ўзорную школу і напоўніць яе вучнямі Талькаўскай школы, закрыўшы яе. Сёння ў Тальцы навучаецца каля 70 дзяцей, а ў Блужы — каля 50...
Такая вось сітуацыя. Быццам бы мяне і не чапаюць: з працы не звольнілі, хаця я застаюся сябрам Партыі БНФ, але і даюць зразумець, што пра мяне помняць...
Iгар ЗАЛЕСКІ I 28 студзеня 2010 г. газэта "Народная воля"
|
