Начальнік Мінскага абласнога аддзела
адукацыі Т.І.Данілевіч
15 студзеня 2010 году загадчыца Менскага абласнога ўпраўленьня адукацыі Таіса Данілевіч выставіла ўльтыматум шасьці настаўнікам – сябрам дэмакратычных палітычных партыяў: або яны пішуць заявы аб выхадзе з партыяў, або трацяць працу. У Менск у суправаджэньні кіраўнікоў раённых аддзелаў ці ўстановаў адукацыі былі выкліканыя: Натальля Ільлініч, настаўніца геаграфіі, Партыя БНФ (Талька); Мікола Ляшчун, настаўнік замежных моваў, Партыя БНФ (Лагойск); Алесь Язьвінскі, настаўнік фізкультуры, КХП-БНФ (Нясьвіж); Уладзімір Парэйка, настаўнік геаграфіі, БСДП (Нясьвіскі раён); Сяргей Клімёнак, настаўнік фізкультуры, АГП (Вялейка); Надзея Агафонава, настаўнік-дэфэктоляг, АГП (Любань). Паводле сьведчаньняў настаўнікаў, размова з боку Т.Данілевіч мела агрэсіўны і абразьлівы характар. Сярод яе "аргумэнтаў” былі апазыцыйнасьць партыяў, да якіх належаць настаўнікі, ды меркаваны ўдзел апошніх у кампаніі мясцовых выбараў. Прысутным кіраўнікам аддзелаў і ўстановаў адукацыі было загадана звольніць настаўнікаў, якія ня выйдуць з партыяў. Прэтэнзіяў да якасьці пэдагагічнай працы выкліканых настаўнікаў не было. Іх і не магло быць. Прыкладам, сп-ня Натальля Ільлініч цешыцца заслужаным аўтарытэтам сярод калег і любоўю дзяцей, вядзе краязнаўчы гурток і сайт, ладзіць штогадовы фальклёрны "Талькаўскі фэст”, вядомасьць якога далйка перасягнула межы вобласьці, мае мноства ўнікальных мэтадычных распрацовак і публікацыяў, у тым ліку ў падначаленым сп-ні Данілевіч выданьні "Адукацыя Міншчыны” (апошняя ў № 5, 2009), вяла для калегаў майстар-клас і сэмінары ў Абласным інстытуце разьвіцьця адукацыі, мае граматы, дыплёмы й падзякі – у тым ліку ад абласнога ўпраўленьня адукацыі. Мікола Ляшчун, таленавіты пэдагог і прызнаны ў краіне перакладчык сусьветнай паэзіі на беларускую, аўтар некалькіх кніг, актыўна выкарыстоўвае свой творчы патэнцыял у мэтадычных распрацоўках. Добрых словаў заслугоўвае пэдагагічная праца ўсіх іншых настаўнікаў. Усе яны вядуць грамадзка-палітычную дзейнасьць у рамках зарэгістраваных палітычных партыяў асобна ад прафэсійнай працы. Мы ўглядаем у паводзінах Т.Данілевіч відавочнае і дэманстратыўнае парушэньне заканадаўства краіны. Мы бачым прыкметы парушэньня: - арт. 4, 5, 33 і 36 ("Кожны мае права на свабоду аб’яднаньня”) Канстытуцыі Рэспублікі Беларусі; - арт. 3 Закону "Аб палітычных партыях” ("Прыналежнасьць або непрыналежнасьць грамадзяніна ня могуць служыць падставай для абмежаваньня ягоных правоў і свабодаў”); - арт. 14 Працоўнага кодэксу Рэспублікі Беларусі ("Дыскрымінацыя, г. зн. абмежаваньне ў працоўных правах … у залежнасьці ад … палітычных поглядаў, удзелу ці няўдзелу ў прафсаюзах ці іншых грамадзкіх аб’яднаньнях, … забараняецца”); - арт. 45 Закону "Аб адукацыі” ("Установа адукацыі нясе … адказнасьць за: … парушэньне правоў і свабодаў … работнікаў установы адукацыі”); - арт. 194 ("Перашкода законнай дзейнасьці грамадзкіх аб’яднаньняў”) і арт. 199 Крымінальнага кодэксу ("Парушэньне заканадаўства аб працы”). Акрамя таго, зьвесткі пра партыйную прыналежнасьць не фіксуюцца ў працоўным справаводзтве і адносяцца да прыватных. Г. зн., Т.Данілевіч апэравала незаконна сабранымі зьвесткамі. У сувязі з выкладзеным: 1. Выказваем безумоўную салідарнасьць з Натальляй Ільлініч, Міколам Лешчуном, усімі настаўнікамі і дакляруем ўсемагчымую падтрымку і дапамогу ў абароне іхных законных правоў. 2. Заклікаем іншых настаўнікаў да прафэсійнай салідарнасьці з калегамі. Гэта асабліва важна напярэдадні кампаніі мясцовых выбараў, калі ўлады зьбіраюцца зноў выкарыстаць настаўнікаў для запаўненьня складу выбарчых камісіяў і паставіць іх перад выбарам, ці ўдзельнічаць у масавых фальсыфікацыях вынікаў галасаваньня. 3. Лічым падзеі 15 студзеня ў Менскім абласным ўпраўленьні адукацыі праявай грубага ціску на сяброў дэмакратычных партыяў як магчымых удзельнікаў мясцовых выбараў. У сувязі з гэтым заяўляем аб заведамай недэмакратычнасьці гэтай кампаніі і неадпаведнасьці яе стандартам АБСЭ ды інфармуем пра гэта кампэтэнтныя міжнародныя структуры. 4. Партыя БНФ патрабуе неадкладнага звальненьня Т.Данілевіч з пасады загадчыцы Менскага абласнога ўпраўленьня адукацыі за грубае парушэньне пэдагагічнай і кіраўніцкай этыкі, а таксама ініцыюе зварот у органы пракуратуры з патрабаваньнем расьследаваньня фактаў дэманстратыўнага парушэньня сп-няй Данілевіч палажэньняў Канстытуцыі і шэрагу законаў Рэспублікі Беларусі.
|