"Ладдзя роспачы" бяз цэнзарскай рэзкі ў раённай бібліятэцы

У сераду, 23-га, у актавай залі раённай бібліятэкі адбылася прэзентацыя першага непадцэнзурнага выданьня аповесьці Уладзіміра Караткевіча "Ладдзя Роспачы”. Нагадаем, што выданьне было прызнанае экспертамі "Нашай Нівы” кнігай году — 2010.

У прэзентацыі ўзялі ўдзел укладальнік, журналіст газэты "Звязда” Глеб Лабадзенка і мастак Аляксей Кульбіцкі. Апроч прэзентацыі "Ладдзі” Глеб і Аляксей расказалі пра сваю новую працу — стварэнне ўнікальнага фотаальбома Радзівілаў, у які ўвойдзе 500 даваенных здымкаў з гісторыі знакамітага шляхетнага роду.

Мерапрыемства наведалі нясьвіжане і навучэнцы коледжа імя Я.Коласа. Напрыканцы імпрэзы удзельнікі мелі магчымасьць адказаць на пытаньні віктарыны і атрымаць каштоўныя падарункі.

Алесь Язьвінскі