Чарговыя пагрозы вынішчэньня беларускай нацыі
Заручыўшыся няўмяшаньнем Эўразьвязу, антыбеларускі рэжым, як бачым, перайшоў у адкрыты наступ па вынішчэньні беларускай нацыі. Русіфікатары, праўда, ужо даўно не хаваюцца, але цяпер адчулі, што могуць рабіць што хочуць. У гэтыя дні пачынаецца рэжымны перапіс насельніцтва Беларусі. Пытаньні анкеты складзеныя некарэктна, па шулерскай каляніяльнай мэтодыцы статус кво з мэтай заблытаць людзей і атрымаць адказы, якія можна выкарыстаць супраць беларускай мовы, каб потым абгрунтоўваць русіфікацыю і акупацыйную палітыку. Галоўнае пытаньне перакруцілі так: “Ваша родная мова?” А ў дужках дадалі заведама няправільнае тлумачэньне ці, дакладней, указаньне (“мова, засвоеная першай у дзяцінстве”). Тым часам роднай мовай зьўляецца мова нацыі да якай чалавек належыць, хоць ён можа нават не размаўляць на ёй ня тое што не засвоіць першай. Гісторыя акупацыяў, калянаялізму і імпэрыялізму пакінула сваю спадчыну ва ўсім сьвеце і добра адлюстравала гэтае палажэньне . Давер да гэтакага перапісу такі, як да лукашысцкіх выбараў, усё апускаецца ў гэбоўшчыну і лжывую твань. Увогуле, беларусам павінна быць ужо даўно зразумела, што як бы ні выкручаваліся “ворагі чалавецтва”, адказваць на ўсе іхныя анкетныя пытаньні трэба проста і аднаслоўна: “беларус”, беларуская”, “беларускі”, “Беларусь”. Нельга даваць сябе акалпачыць. Ня трэба ўступаць у лішнія размовы з перапісчыкамі, бо пытаньні складзеныя па жандармска-кагэбоўскаму прынцыпу і парушаюць права на прыватнае жыцьцё чалавека. На некаторыя пытаньні чалавек таму мае права не адказваць альбо адказваць так, як лічыць патрэбным для сваёй абароны. х х х
Апошнім часам (пасьля захопу ўлады ўзурпатарам на трэці тэрмін кіраваньня) я пастаянна зьвяртаю ўвагу, што дзейнасьць Лукашэнкі стала асабліва небясьпечнай для краіны і нацыі. Цяпер жа, пасьля ўводу чужога войска і спробаў сфальшаваць дэмаграфічную сытуацыю мусяць быць дзеяньні ў адказ. Маўчаньне абазначала б капітуляцыю грамадзтва перад цемрай (а мы назіраем ужо гэты працэс капітуляцыі, асабліва ў інтэлігенцыі, у СМІ, у так званых грамадзкіх вярхах).
Нагадаю зноў, што рычагом для грамадзкай барацьбы з антыбеларускім рэжымам павінен стаць эканамічны крызіс і падрыхтоўка агульнанацыянальнага байкоту выбараў Лукашэнкі. Гэта цяпер галоўная наша задача і галоўная праца.
Зянон Пазьняк Старшыня Беларускага Народнага Фронту “Адраджэньне” і Кансэрватыўна-Хрысьціянскай Партыі – БНФ 11 кастрычніка 2009 г.
|