Прыехалі

Ліберальная адлега, што мела некаторае месца напярэдадні выбарчага сьпектакля, раптоўна адыйшла ў нябыт 19-га сьнежня. Ёй на зьмену прыйшлі жорсткія захады рэжымнай хунты. Усе дзеяньні не па закону, а па паняцьцям. Хто начальнік – той і закон.

Да ўсяго дадаюцца эканамічныя праблемы. Іх пакуль яшчэ на сабе не адчула беларускае насельніцтва, але гэта ўжо не за гарамі, бо жыць не па сродках, залазячы ў даўгавую яму, магчыма толькі пэўны час.

Што мы маем сёньня? Маем каля 25-ці мільярдаў даляраў у пазыках, якія ўжо трэба пачынаць аддаваць па 2 мільярды ў год + крэдытныя адстоткі, што расьцягнецца на 12-15 гадоў наперад. Але ж каб было чым разьлічвацца – трэба спачатку нешта зарабіць, а ў мінулым годзе Беларусь мела мінус 7 імльярдаў убыткаў і няма ніякай надзеі выйсьці хоць бы на нуль у бліжэйшым будучым.

Эўропа павярнулася да нас "задам” і не зьбіраецца больш даваць Беларусі грашовыя пазыкі, якія праядаюцца рэжымам і выкарыстоўваюцца толькі на выжываньне замшэлай калгаснай дыктатуры. Расея таксама больш не зьбіраецца задарма падкідваць тлустыя кавалкі ўзамен на пацалункі ды абяцанкі. Сытуацыя тупіковая. Застаецца толькі прадаць на любых умовах, за любую мізэрную суму тое-сёе, што яшчэ цікавіць расейскіх алігархічных акул і можна ўціхую загружаць самалёт на Каракас. Прыехалі.

Алесь