 Загадкавыя авіярэйсы паміж Беларусьсю і Лібіяй Прадстаўнік Стакгольмскага міжнароднага інстытуту праблем міру SIPRI Х’ю Грыфітс, спасылаючыся на крыніцы ў авіяцыйных колах, паведаміў пра рэйс вялікагрузнага самалёта зь Беларусі ў Лібію.
"Іл-76 вылецеў у Лібію 15 лютага з Баранавічаў. Мы моцна падазраем, што ён вёз зброю. Ён прызямліўся ў аэрапорце Себха, глыбока ў пустыні на поўдні Лібіі. Гэта адзін зь нешматлікіх аэрапортаў, якія па-ранейшаму знаходзяцца пад кантролем Кадафі і якія ня могуць кантралявацца ваенна-марскімі радарамі ЗША, НАТО або эўрапейскіх ваенных судоў,” – заявіў экспэрт.
Ён сказаў, што інстытут доўгі час сачыў за гэтым аэрапортам, які часта выкарыстоўваўся для перавалкі зброі з краін Усходняй Эўропы ў краіны на поўдзень ад Сахары.
Інстытут таксама зафіксаваў рэйсы самалётаў з Трыпалі ў Беларусь у апошнія некалькі дзён, прынамсі, самалёт Falcon 900, які выкарыстоўваецца кланам Кадафі. Х’ю Грыфітс адзначыў, што сын Кадафі Хаміс падтрымлівае асабліва шчыльныя адносіны з рэжымам Аляксандра Лукашэнкі.
"Нашай галоўнай задачай было адсочваньне паставак зброі зь Беларусі ў апошнія два тыдні, зброі, якія была дастаўленая ў аэрапорт Ямасукро ў Кот-д'Івуары і ў аэрапорт Себха ў Лібіі", – сказаў ён.
Раней пра авіярэйс невядомага самалёта з Трыпалі ў Менск і назад паведамлялі Ізраільская газэта Haaretz і Малтыйскі інтэрнэт-партал MaltaToday. Перамяшчэньне самалёта адсочвалі так званыя плэйнспотэры, добраахвотныя «шпіёны» за палётамі авіяляйнэраў.
На мінулым тыдні незалежныя СМІ пісалі пра прыбыцьцё ў Менск начальніка Галоўнага ўпраўленьня тылу і вытворчасьці Галоўнага ўпраўленьня камітэту абароны Лібіі Абдэрахмана Сеіда. Афіцыйнага пацьверджаньня гэтага візыту не было.
радыё Свабода, 28.02.2011
|
